March 13, 2022 thok in kan umnak Ontario cozah nih Motor license kum chiar sticker kan tuah tawn mi khi tuah aum ti lai lo tiah an thanh. Kum khat caah atlawm bik $120 liam tawn arak si. Covid pulrai achuak hnu in mipi kan khuasak ahar deuh tuk pin ah thil man zong akai tuk caah March 2020 hnu in motor license Sticker nan rak tuahnak man vialte khirh dih nan si lai tiah Ontario Premier Doug Ford nih achim chih. Cucaah nan motor Sticker renew nan tuah hnu in nan umnak inn ai țhial mi nan um ahcun nan address thar kha Service Ontario website ah rak thleng cio uh, cu lo ah cun phaisa kan in khirh mi hna Cheque in kan nin kuat hna tikah nan hmu sual lai lo tiah an thanh chih. Address ai thleng lomi caah cun apoi lo. Cun palik nih ticket pek mi maw, parking ticket man liam lomi hei ti bantuk angei rih mi nan um ahcun March 7, 2022 hlan ah rak liam te uh an ti. Nan liam lo ahcun nan Sticker man kha khirh nan si lai lo tinak asi.
Tu kum June 2022 ah khin Ontario cozah thimnak (Provincial Election) aum ding asi caah Doug Ford nih mipi thimfung hmuh duh ah aherh lomi atuah i asi, kum 1 ca maw asi lai, kum 10 ca maw asi lai ti zong theih asi lo tiah Opposition Party nih an mawhchiat len ve. Cun Ontario ah hin motor ngei hi 8 Million hrawng kan um i tutan Sticker man akhirh ding mi hna hi atlawmbik $1 Billions asi lai caah hi vialte phaisa va khirh hi aherh maw tiah Opposition nih cun an el len ve. March thla dih in khirh vun thok asi lai i zapi cu April thla chung ah hmuh cio asi te lai tiah an thanh chih. Address thlen ahau mi nih atang i Address Change timi nganpi in kan țial mi khi Click uh law nan address thlen khawh asi.
No comments:
Post a Comment