Covid Vaccine Chunh Cio Ding

Tu kum hi ruah lo pi in Canada hi Covid-19 zawtnak akarh ngai ngai i buaktlaak minung zat in tuak ahcun US nak hmanh in Canada ah Covid in azaw mi an tam deuh cang tiah an țial. Hi tining i akarh ahcun hi hnu thla hnih (June) ah khin cun 600% bak in akarh lai ti asi. Atutiang ah tlangrai sii (Vaccine) ai chun cang mi hi 22% lawng an si rih ti asi. Abik in Ontario ah hin akarh arang cem.

November 2019 in arak chuak mi Coronavirus (Covid-19) zawtnak tlangrai cu nihin tiang vulei cung dihlak ah zawtnak nih atlunh mi hna hi minung 140 million leng an si cang nain cu chung in adam țhan mi hna hi 120 millions an si ve ti asi. Nihin tiang vulei cung dihlak ah Covid zawtnak ai thih pi mi cu 3 millions leng an phan ve cang ti asi.

Ontario

Tlangrai sii (Vaccine) phunphun achuak cang i ramkip ah zei mawzat cu i chunh cio asi cang. Canada ah hin Covid vaccine an chuah mi ah Pfizer, Moderna, Johnson & Johnson le Oxford nih an sermi AstraZeneca timi pawl zei mawzat ahung phan ve. Atulio Ontario ah akarh mi Covid hi UK Variant B1.1.7 timi asi i akarh arang ngai ngai. Ontario um mi minung dihlak hi 14 million kan si i Canada ram pumpi i 38% hi Ontario ah aum mi kan si. Atu ning tein akarh ahcun nikhat ah Ontario lawng ah minung 30,000 kan zaw kho ti asi.  Cucaah nikhat ah minung azaw kho mi let hra tluk nih sii hi i chunh ah ațha ko tiah an ruah. Chim duh mi cu nikhat ah minung 300,000 nih vaccine hi i chunh ding tinak khi asi hnga.

Vaccine Chunh Kong

Atulio Vaccine chuak mi phunphun lak ah i chunh tikah ai ziak lomi nih thi-khal (Blood Clot) an ngei kho an timi cu AstraZeneca hi asi. Hi sii hi Quebec ah minung pakhat le Alberta ah minung pakhat cung ah ai ziak lomi an hmuh hna caah an țih deuh i asi rua, Canada aphanh nak asau cang nain zapi caah an thlah colh lo. Minung 1 million ai chun mi ah pakhat khi thi-khal ai ton sualmi hmuh mi khi asi ti asi. Cun Europe ram ah ram ceukhat nih i chunh lo ding ti tiang an chim pah caah zapi kan thin akan phan ter deuh mi asi. Asinain ahim tuk mi asi ko tiah an chim. Canada aphanh asau cang nain chunh loin an chiah caah atuhi ni caan aluan (Expire) ding mi Fridge ah an chiah mi atamtuk cang ti asi. Nizan CBC le Global News ah kum 40 cung paoh nih AstraZeneca Vaccine hi i chunh khawh dih asi cang lai tiah an vun thanh. 

Thaizing (April 20, 2021 Tuesday) in appointment laak khawh asi cang. Cucaah hi tlangrai sii hi asi khawh chung in i chunh dih cio ah ațha ko. Chunh hnu ah Thi-khal ai ton sualmi zong cu an thi colh tinak asi lo, an thlop hna i an dam țhan ko. Pharmacy hmun kip ah kum 40 cung paoh cu appointment laak khawh asi cang, kum 18 cung paoh hmanh in i chunh khawh asi kho men ko lai tiah an chim pah i nanmah tein chonh cio le hlat cio khawh zong i zuam uh law ațha lai. Federal cozah nihcun kan hnu khan chunh ding aduh ko nain Ontario Province nih khan ahim deuh rua lo tiah an thin avun phan deuh caah caan zei maw zat an liam deuh sual i atu cu i chun dih ding in Ontario Health Minister Christine Elliott nih achim ko cang.

Chunh cio ah ațha ko.

KW Chin Community

Kitchener, ON
April 19, 2021