Waterloo Region Covid-19 Ralrin Thawngthanhnak

Kan umnak Waterloo Region cu November 23, 2020 thok in Covid-19 tlangrai akarh lonak hnga ralrin ding an tuah mi adotdot ah "Red Zone" dirhmun ah thanh asi cang. Covid-19 ralrinnak caah hin adotdot tein an ser i țih anun tuk lonak hmun khi Yellow Zone an si, țih avun nun deuh nak hmun khi "Orange Zone" an si i țih anung tuk cang timi hmun khi "Red Zone" cu asi.

Red Zone si hnu ah cun innchung ah minung 5 cung mi buu i ton lo ding le aleng i puai tuah hei ti bantuk (Public Events & Social Gatherings) zong ah minung atambik 25 cung i ton khawh asi ti lo. Hi bantuk tuah lo ding timi nawl abuar mi cu minung pakhat ah $750 liam ter asi lai. Cun kan umnak Waterloo Regional Council zong nih order an chuah mi cu Waterloo Region hmun paoh i Bus Terminal, Market, Store, ti bantuk ah hmurhmuh (Mask Bylaw) hi May 31, 2021 tiang khi i hruk hrimhrim asi lai tiah kan hnu thla khan Order an chuah cang. 

Canada ram pumpi hrim hi i ralrin lo ahcun khuasik, vur tlak (Snow) nih avun kan phanh cang caah Covid-19 karh hi arang chin chin lai i nikhat ah minung 60,000 tiang in kan zaw kho tiah thawng an thanh. Kan umnak Ontario Province zong nikhat ah minung 6,000 in akarh kho an ti caah kan i ralrin taktak ahau.

Kan theih aherh mi;

1. Khua leng nan chuah tikah hmurhmuh (Mask) nai ken hrimhrim lai. Bus hngahnak (Bus Station), Tlanglawng hngahnak (Train Station), Chawdawr hmun ( Markets, Convenience Stores) paoh ah hmurhmuh i hruk hrim hrim ding.

2. Mi inn len, abik in Apartment um mi hna pawl inn ah duh paoh in nan va lut chuak lai lo, nan pawngkam Mirang le mi phun dangdang nih nawlngeitu sin ah phone chonh in report tuah khawh asi caah ralrin hrimhrim ding

3. Hand Sanitizer, dur fa mi tete khi leng chuah caan paoh 

ah i ken peng i kut i hnawh colh lengmang ding

4. Khoika na umkal paoh ah midang he pe 3 hlat in um zungzal i zuam ding

5. Khuh khuh, khuasik, chungtlik i ruh khuafah phun in na um ahcun Waterloo Public Health ah arannak in phone chonh hna in na sining chimh hna ah ațha bik.

Adonghnak ah ralrin pek kan duh mi cu, Covid-19 cu tlangrai asi, ahohmanh vanchiat i ton sual i zawt sual ahcun ningzah hrimhrim lo ding, pawngkam neih niam sin ah chim colh hna in ralrin i pek colh ding asi. Cun adam lomi pumpak, innchungkhar um sual i leng achuak kho lomi nan um sual i arannak bomh chanh hau dirhmun nan si ahcun ahcun, Community upa, Khrifa upa pakhat khat si lo le neih niam hawikom sin ah thawngthanh i zuam hrimhrim ding.

Bawipa nih kan umpi cio hram ko seh!

KW CHIN COMMUNITY

November 22, 2020